Преспа се соочува со сериозни проблеми со отпадот, кои произлегуваат од лошите практики на жителите, земјоделците и бизнисите за негово отстранување, недоволната инфраструктура на општината и комуналното претпријатие и ниската еколошка едуцираност на населението. Овие проблеми претставуваат значителен ризик за здравјето на луѓето, локалниот екосистем и особено за Преспанско Езеро кое е единствено и чувствително природно подрачје.

Населението има ограничени познавања за здравствените закани и  влијанието на отпадот врз животната средина, како и за можностите за негово намалување и повторна употреба. Производството на јаболка е примарен извор на приход во Преспа, па  прекумерната употреба на пестициди и синтетички ѓубрива ја загадуваат почвата и подземните води, а жителите, особено во селата, немаат доволно информации и едукација за управување на биоразградливиот отпад.

Сегашните практики за отстранување на севкупниот отпад од страна на општината не се усогласени со еколошките стандарди. Отпадот не се сортира, а евидентирани се околу 38 мали и средни диви депонии, што претставува ризик за почвата, водата и воздухот.

Загадувањето со цврст и биоразградлив отпад го загрозува и Преспанско Езеро и неговата околина, како што се зголемена еутрофикација на водата и губење на видови и живеалишта.

Поради тоа, Институтот за комуникациски студии (ИКС), во соработка со Еко герила Преспа и Македонско еколошко друштво (МЕД), ја спроведува кампањата за подобрување на практиките за управувањето со отпадот „Преспа? Разбуди се за чиста средина”.

Кампањата има за цел да ги поттикне локалните заедници за одржливо управување со отпадот, со фокус на селекција, намалување и соодветно отстранување на комуналниот, земјоделскиот и индустрискиот отпад. Со неа ќе се подобри знаењето на жителите, но и ќе се охрабрат да ги променат навиките правилно да постапуваат со различните видови отпад што го создаваат. Населението ќе биде особено едуцирано за одвоено собирање на отпадот и приклучување кон општинската мрежа за отстранување на отпад.

Кампањата се реализира во рамки на проектот „Поттикнување на промени во однесувањето на граѓаните за подобрување на практиките за управување со отпад во Преспанскиот регион“, финансиски поддржан од Европската унија.