Во Преспа претставени практики за одржлив туризам и одговорно управување со отпадот

Преспа има силен потенцијал да се развива како автентична и одржлива туристичка дестинација, особено кога природните убавини, локалната храна, традицијата и одговорното управување со ресурсите се поврзуваат во едно заедничко искуство.

Токму ова беше во фокусот на настанот што се одржа на 31 мај 2026 година, на агро-туристичката фарма „Spirit of Prespa“, каде што беа промовирани одржливи туристички практики, одговорно управување со природните ресурси и компостирањето како практично решение за третман на органскиот и биоразградливиот отпад.

На активноста ѝ претходеше еко-туристичка промотивна тура што започна во Стење и вклучуваше патување по воден пат до островот Голем Град, како и готвење во природа на плажата во Стење со професионален готвач. Преку ова искуство, учесниците имаа можност одблиску да ги запознаат природните убавини на Преспа и потенцијалот на регионот за развој на автентична туристичка понуда.

Потоа, програмата продолжи на фармата „Spirit of Prespa“, каде што учесниците се запознаа со начинот на работа на фармата, нејзината агро-туристичка понуда и практиките што ги применува за одржливо користење на земјоделските ресурси.

Во рамки на настанот беа претставени три туристички производи кои покажуваат како локалната храна, традицијата, земјоделството и природата можат да станат дел од препознатлива и одржлива туристичка понуда. Преку овие примери беше нагласено дека развојот на туризмот во Преспа е тесно поврзан со зачувувањето на чиста животна средина и со одговорниот однос кон природните ресурси.

Посебно внимание беше посветено на компостирањето како практично решение за органскиот отпад. Учесниците се запознаа со модел на класично компостирање што може да се применува во секој дом, двор или земјоделско стопанство, со цел органскиот и биоразградливиот отпад повторно да се искористи како ресурс.

На активноста присуствуваа околу 50 учесници, меѓу кои млади луѓе, претставници од училишта и наставен кадар, туристички агенции, тур-оператори, туристички водичи и туристички работници.

Настанот беше заокружен со традиционален ручек подготвен од Рурални жени од Преспа и послужен во двор со автентичен семеен амбиент, со што дополнително беше истакната важноста на локалната заедница во создавањето одржлива туристичка приказна.

Ваквите активности покажуваат дека Преспа има потенцијал да се развива како одржлива туристичка дестинација, преку поврзување на природата, традицијата, локалното производство и практиките за заштита на животната средина.

Настанот го организираа Еко Герила Преспа и Институтот за комуникациски студии како дел од кампањата за управување со отпад „Преспа? Разбуди се за чиста средина“, која е поддржана од Европската унија.